2 Timothy 2

La Gni-agni N Yesu Akala Yi

1O, Timatawus emi nugun, la dna kala dna n kala n Kristi Yesu wa gaho nyi. 2Gama dole ha wu aza aɓo n hohin ɓedo na azajei ɓei wo mi-i da. Wu aza agaiciya da nɓa ɓami ɓa ka azaje wu.

3La oho robo dna n wahala sin ngye soja manayi Yesu Kristi nya. Shi mi zhin nyi. 4Ngye Krist soja to da hohin dna n anyi gmadan, gama ho ta mi ha zhin oɓo n kwo da oza n wa kni ho nyin. 5Vi Dagayi awyidna owo tnu-tnu zhin nya, shi asibui zhin agbetu sibui nya kwo bai bwa lada kwo to ɓai bwa ladan nyin. 6Zhin tnu-tnu n kalayi n gye fwaiza n wo bwa lada n mwa woi ya nufwa n mwa nyi. 7Zhin nubo n na amisali yei n gun ata n mi gaho nyi, Dagayi wo wu ho shi ɓa n na apmai lo n ho aba.

8To ze gaiciya amwi n ge Yesu Kristi ɓei zhin zanyikwocinun, a mawo dna n Esu Dawuda efyen, woi zhin Shekwoyi nu, shi owo kala la n efi kwo wu yi. 9Ntuge ma zhin waʼazi gaiciya yakwo ye nya nu, cenu zhin mi-i dna gni n wahala n ya, ai lami dna n kurkuku ngye ɓenukwoyi zhin yi. Ama ato pa Shekwoyi ɓedan, kwo ai la mi pan. 10Mi shiri lo ma sin wahala, ndei okwo nu ɓa ɓe n gni-gni yi, n mwamwa nyalo-nyalo nya yi, dna n Kristi Yesu ga aza n Shekwoyi n la ɓa kni nyi.

11Gaiciya deye zhin kwa fu mi bugba, nge Esa n ya sin wahala ya fi ntu n Kristi ɓo, kwo wunu ge yi ɓa ya asese n woi n eshemi. 12N ya zʼhin nubo nge owo tnu-tnu n yi zhin nyi kwo dna ɓelo, pa ge n wyi-hoi yi ɓei se ase n woi ya gyi ebe n woi. Ama n ya fa wahala sin ɓo ya pmi avun wu Kristi, wo ɓei pmi avun wu yi ce. 13Kwo esa n yi gaiciya ga gba kala, wo zhin gaiciya da nu, woi bmayi zhin gama wo ta nayi aɓon, yi zhin wo aga nu, Wo ɓa nuwo alkawali.

Bui Aɓena Gboloyi Si

14Pa oho aza a gaiciya ye ɓo, ha gaɓa wyidna dna n Kristi eye ɓa to na aɓo tu n aɓo nba to na apma yin, aɓenaye pya to n na apmayin, ɓai dna aɓo wyegma har ɓai ɓe n wahalai. 15Zhin tnu-tnu n kalai, n na bai Shekwoyi ɓa cihoge, “Sanu n tnu-tnu yi.” Ha ze tnu-gnu zhin yi manayi n vinyikwo ta wo won, esa n. Shekwoyi a dna wo a tnu-tnu wye n cei. Kpe nya n wo ɓeda da kwoi wu njesun. 16La bui aɓeda kasa si n ɓa zhin aza ɓai gyi minagyi n na ajei nyi. 17Aɓa da aɓo n ɓa ɓa san za har nsai mwa. Himinayus n Filitus yi zhin aza nu n ɓa ye n na ɓeye pya yi. 18Ɓa ku gaiciya zokwo fa, ɓai zhin waʼazi akata nya nge kala ku n efi la diya, ɓai la azaho gaiciya ga shan-shan n ɓa gwo ɓa ɓeda nyi.

19Ama Shekwoyi gaiciya gni agni lo ngye apma, nyaho ta shan kwo ashan. Fandashen kuta nyanu, n na aɓedaye yi ka kpe n kwo, “Dagayi kpe aza yi lo n ɓa zhin owo anya.” Njesun, “Oza n wo yi wohin nge Yesu viyi wo to zhin aɓo nukwoyi zhin.”

20Nna anyabwayi puwa akwanu zinariya nya nyi n azurfa nya yi, adoho n shinwayi nzun yi, anakwoi a zhin azhiɓei dnagmai ɓo nu cei, a tna nakwoi azhin apma n cei n gace kwo a ya anya nukwoyi fi. 21Ndei ha bui laifi si, hoɓa ze ngye kwanu n na zhin a zinariya manayi, kwanu manayi du-duyi vinya n puwa, n nabai Kristi n wohin wo ɓa zhin apma n hoi n wo ɓeye manayi ɓo.

22Bui enya si nkwo ɓa ɓe ho n na nubo zhin nukwoyi, n kwo ɓe samari aba, ama la nyima enya vinya n kwo zhin ho ha wo ɓemana zhin pwa. Bwa gaiciya ga n ye-yei, ha gyi nugundo n na azayi n ɓa ye Dagayi, n na bugba manayi. 23Njesun ma ci ge to lo dna n na aɓena n ɓa lo n azayi n minagyi n. 24Shekwoyi aza ta ku ze anya wuyin, tilas ɓaku ze amishiyi, hakuri da, ɓai wu aza nɓa ku bwi aba. 25Gba hohin tukwo esa n ho wu aza, n gaiciya nku ɓa gmi aje. Gama n ha daɓo n ɓai peceiye n na atnazhin yi, kpekni, dna n Shekwoyi bmazhin ɓa ɓa pmi ɓe ɓa vi gaiciya. 26Nsayi ɓa kpe genyi, ɓa pwo shetan agam, fyenu laifi nya n wo zhin apma n cei woi wan ɓa nyi, nsayi ɓa ya Shekwoyi ɓeye zhin.